𝗜𝗟𝗢𝗜𝗟𝗢 𝗖𝗜𝗧𝗬 — Nagpasalig ang Office of the Building Official (OBO) nga mas istriktohon ang ila nga implementasyon sang pagsulundan ilabi na sa paghatag sang mga building permits.
Sa interview sang Bombo Radyo kay Engineer Mavi Gustilo, head sang Office of the Building Official, iya ginpahayag nga nagakatabo ang masami nga problema sa isa ka proyekto bangud wala sang ‘proper coordination’ sa Local Government Unit (LGU).
Suno kay Gustilo, nagaluntad lamang ang problema bangud nagapatuman sila sang implementasyon sa isa ka proyekto apisar nga wala sang building permit.
Ginpahayag man sini nga apisar pa nga nasugodan na ang isa ka proyekto nga wala sang permit, mahimo sa gihapon nga makaproseso sila sang mga requirements agud makakuha sang building permit.
Gin-athag man sang natungdan nga wala sang pagpamulitika sa pagpatuman nila sang mas istrikto nga pagsulundan.
Posible naman nga magpatawag sang meeting ang talatapan sa mga wala nakakuha sang building permit agud nga maplastar ang mga kakulangan sang mga proyekto.
Nagalaum naman ang Office of the Building Official nga mahatagan sang solusyon ang mga ginapangatubang nga problema paagi sa nasambit nga tikang.
