ILOILO CITY – Ginpasalig sang officer-in-charge sang Department of National Defense (DND) nga top priority sini ang pagpabilin sang soberanya sang Pilipinas sa mga territorial waters sa iya 10-point agenda sa ahensya.
Suno kay DND officer-in-charge Jose Faustino Jr., ang administrasyon ni President Ferdinand Marcos Jr. ang maga-prioritize sang pagpetisyon sang desisyon sang 2016 sang Permanent Court of Arbitration nga naga-invalidate sang claim sang China sa West Philippine Sea.
Dugang pa niya, nagasunod siya sa mandu sang presidente kun paano ang mag-deal sa China ilabi na sa mga butang nga may kaangtanan sa iban nga avenues sa baylo nga pag-istorya nahanungod sa West Philippine Sea.
Kalakip sa mangin tikang sang pungsod amo ang posibilidad sang military-to-military exchange sa China.
Apang, ang soberanya ang dapat sa gihapon nga kilalahon kag kinahanglan nga proteksyunan ang territorial integrity bisan nga wala pa sang arbitral ruling.
Ang 2016 ruling sang international tribunal sa The Hague ang wala nakapugong sa Chinese militia kag Coast Guard vessels sa pagpahilabot sa mga teritorrial waters nga sakop pa sang Exclusive Economic Zone (EEZ) sang Pilipinas.
Sang nagligad nga bulan, gin-harass sang Chinese vessels ang Filipino vessels nga nagdala sang materials kag suporta sa BRP Sierra Madre sa Ayungin Shoal.
Apang suno kay Faustino, ang pungsod ang magapadayon sa pagpakigbato sa soberanya sini sa nasambit nga lugar.
Magluwas sa paprotekta sang Philippine teritory, tinutuyo ni Faustino nga ma-sustain ang whole-of-government kag whole-of-nation approach pinaagi sa NTF-ELCAC agud nga masigurado ang internal stability.
Kabahin man sa 10-point agenda amo ang pag-una sang disaster resilience kag climate change adaptation, pag-advocate sang pagpabaskog sang Reserve Force bilang force multipliers, pagpasigurado sang ikaayo sang suldado, beterano kag sibilyan, pag-promote sang mga tikang nga makasolbar sang nagatuhaw kag nagadamo nga cyber threats.
Nagalaum ini nga ang iya 10-point agenda ang madala sa pinakauna nga State of the Nation Address (SONA) ni Marcos sa Lunes.
