ILOILO CITY – Nagabuligay ang mga pumuluyo kag ang barangay officials sang Sto. Niño Norte sa distrito sang Arevalo sa pagkuha sang nagtagas nga langis gikan sa naglupok nga power bunker sa Zone 3 Bo. Obrero, Lapuz, Iloilo City.
Sa interview sang Bombo Radyo kay Barangay Kagawad Norylyn Espora, iya ginpahayag nga sa tion nga magtaub, nalab-ot sang tubig ang kudal sang mga balay nga yara sa higad sang baybay rason nga nagapilit ang langis.
Suno kay Espora, sa tion naman nga maghunas, makita gid sa higad sang baybay ang naga-itom nga bunker fuel.
Sa pagkamatuod suno kay Espora, apketado naman ang mga kaiping nga barangay kag mapanimahu-an gid ang mabaho nga langis.
Bangud sini, ginpanugyanan na ang mga pumuluyo nga likawan anay ang paglangoy sa baybay tubtub nga indi maubos sa pagkuha ang langis.
Santo sa City Disaster Risk Reduction and Management Office, unahon sa paglimpyo ang bahin sang Iloilo Strait kun sa diin nahamtang ang naglupok nga power barge.
Ginabanta nga yara sa 70 ka mga manugpangisda ang apektado matapos nga nakalab-ot na ang oil spill sa Brgy. Calaumpang, Molo, Iloilo City.
Sa interview sang Bombo Radyo kay Ronnie Mandal, presidente sang manugpangisda sa nasambit nga lugar, iya ginpahayag nga ang nagtagas nga langis ang makita nga nagtapik sa mga sakayan nga yara sa higad.
Magluwas diri, kun maghunas naman ang tubig, naga-itom ang mga basura nga makita sa pangpang.
Ginpahayag ni Mandal nga indi sila makapangisda bangud sa oil spill kag mahimo man nga mapatay ang fingerling nga yara sa dagat.
Kun magpadayon ang nasambit nga problema suno sa natungdan, madamo nga pamilya ang magutuman ilabi na ang mga nagasalig lang sa pagpangisda.
