Nagapasalamat ang Barangay Kagawad sang San Isidro, La Paz, nga amat-amat na nga nagakadakpan ang mga indibidwal sa likod sang iligal nga droga sa ila barangay, matapos ang nagluntad nga stabbing incident sang nagligad nga Marso 21, sa tunga sang Pamilya Muya kag Provido.
Sa interview sang Bombo Radyo kay Benjie Legada, Barangay Kagawad sang nasambit nga lugar, iya ginpahayag nga ila na gid nga ginakonsiderar nga alarming na ang mga hitabo kag ang kadamuon sang durugista sa nasambit nga barangay.
Sa pihak nga bahin, ginpahayag ni Legada nga wala na makit-an sa ila barangay kag ginapatihan nga nalagyo si Alex Jadulos nga isa sa ginpasakaan sang kaso kaangot sa kamatayon sang apat ka mga indibidwal.
Suno kay Legada, mabuot kag wala sang gamo si Jadulos kun wala makainom, apang kun mahubog, nagalain na ang batasan sini.
Samtang, natalana naman subong nga adlaw nga ihaya ang bangkay ni Tyron Muya nga isa sa mga napatay.
