ILOILO CITY- Pasado na sa Iloilo City Council ang ordinansa nga nagadumili sa mga salakyan nga masobra sa 27 tonelada ang bug-at nga mag-agi sa Buhang kag Hibao-an flyovers.
Sa interview sang Bombo Radyo kay Councilor Johnny Young, Chairman sang Committee on Engineering Construction and Public Works, iya ginpahayag nga indi na pagpahanugutan ang mga salakyan nga may masobra sa 4 ka axles.
Suno kay Young, mahimo naman maglabay ang mga motorsiklo sa nasambit nga flyovers.
Una na nga nag- ayo ang Iloilo City District Engineering Office sa Iloilo City Council sa pagpasar sang ordinansa nga nagabutang sang maximum load para sa nasambit nga flyovers.
Mahimu magpangatubang sa ₱5,000 nga penalidad kag kumpiskasyon sang driver’s license ang magalapas sa ordinansa.
Nahibaluan nga ginaduso man ni Young ang ordinansa nga nagadumili sa mga tricycle, e-bike kag bisikleta nga maglabay sa mga flyovers sa syudad.
Wala naman nalakip sa dumilian nga mag-agi sa mga flyovers ang motorsiklo.
