MANILA — Ginkumpirma sang Office of the Vice President nga naglagaw si Vice President Sara Duterte luwas sang pungsod kaupod sang iya pamilya sa tunga sang paglaslas sang Bagyo Carina sa Pilipinas.
Ini ang sa tunga sang naglapta nga pictures sang bise presidente samtang yara sa airport.
Sa statement nga ginpagwa sang Office of the Vice President, nakumpirma nga kaupod sang bise presdente ang iya pamilya sa paglagaw sa luwas sang pungsod, apang wala ginpagwa ang lugar kun sa diin ini.
Santo sa impormasyon, natabo ang byahe kahapon sang kaagahon kun sa diin kaupod sini ang iya bana nga si Mans Carpio, tatlo ka kabataan, kag iloy nga si Elizabeth Zimmerman.
Gindepensa man sang iya opisina nga may pahanugot sang Office of the President ang iya paglagaw sa luwas sang pungsod nga napetsahan sang Hulyo 9.
“The Vice President is on a personal trip with her family overseas. Her departure received the necessary approvals, as evidenced by the travel authority issued by the Office of the President dated 09 July 2024.”
Gin-ako man sang opisina nga indi maayo ang timing sang bakasyon sang bise presidente.
Apang ginpasigurado man nga ginamanduan na ni Duterte ang iya Disaster Operations Center nga maghulag apisar wala ini sa Pilipinas.
Nagpasalamat man ini sa publiko sa paghatag sa iya sang respeto samtang nagabaksyon.
“We thank the public for respecting the privacy of the other members of the family.”
Nahibaluan nga ang “Germany” ang nangin top trending topic sa X humalin pa kahapon tubtob subong matapos nakumpirma nga naglagaw ang bise presidente sa European country samtang ginabaha ang pila ka parte sang Luzon nga subong yara sa state of calamity.
Kaangot diri, gilayon man nga nagdepensahan ni Sen. Imee Marcos ang iya suod nga abyan sa pagbakasyon sini.
Suno sa senadora, madugay na nga plano sang bise presidente nga magbakasyon.
Sen. Imee Marcos, a close ally, defended Duterte from criticisms on social media.
“Matagal nang plano ‘yun at hindi naman niya alam na may bagyo, pambihira naman.”
Nahibaluan nga nagdangat na sa 21 ang napatay bangud sa Bagyo Carina, santo sa data sang Philippine National Police.
