Gin-saway sang Commission on Audit (COA) ang Office of the Vice President (OVP) bangud sang gilayon nga pag-establisar sang satellite offices sang nagpungko si Vice President Sara Duterte sa amo nga posisyon sang 2022.
Suno sa 2022 report sang state auditors, napaslawan ang OVP nga mag-comply sa procurement rules kag mga proseso sang nagbakal ini sang propiedad balor masobra P668,000 para sa satellite offices sang Hulyo 2022.
Ginbayaran ang amo nga equipment paagi sa reimbursement sang personal cash sang mga opisyal.
Apisar ginsiling sang COA nga nagbakal ang opisina sang items sa pinakamanubo nga presyo sa merkado, ang indi sini pagsunod sa Republic Act 9184 kag sa implementing guidelines ang nagapakita nga na-defeat sa gihapon ang katuyuan sang Procurement Law nga ma-standardize kag mapauswag ang transparency sa procurement process.
Bilang sabat sa report, nagsiling ang opisina ni Duterte nga ginhimo ang purchase paagi sa reimbursement bangud sang amo nga tion, kinahanglanon na nga handa na ang satellite offices nga may equipment.
Ginpahayag man sini nga may discussion meeting man kaupod sa Administrative and Financial Services Office Group heads kag nakasugtan nga ang reimbursement amo ang pinakamaayo nga option sa amo nga problema.
Matandaan nga ginlunsar ini nga satellite offices sang Hulyo 1, 2022 — nga amo man ang una nga adlaw nga opisyal nga nagpungko si Vice President Sara Duterte.
Nahamtang ini nga mga opisina sa Davao, Cebu, Tacloban, Bacolod, Zamboanga, Dagupan, kag Surigao sa tuyo nga mapasangkad ang serbisyo sang OVP sa mga Pinoy sa guwa sang Metro Manila.
