Gin-aprubahan na ni President Ferdinand Marcos Jr. ang paghatag sang service recognition incentives (SRI) para sa fiscal year 2024 sa tanan nga nagatrabaho sa gobyerno pati na ang mga uniformed personnel.
Ini paagi sa Administrative Order No. 27 nga gin-isyu ni Executive Secretary Lucas Bersamin, Disyembre 13.
Nakasaad diri nga gina-otorisa na ang pag-grant sang one-time SRI sa uniform rate nga P20,000 kada isa.
Dapat ini nga mabaton sang civilian and military government personnel umpisa sa Disyembre 15.
Covered sa gin-grant nga SRI amo ang civilian personnel sa national government agencies lakip na ang yara sa state universities and colleges (SUCs) kag government-owned or -controlled corporations nga may yara sang regular, contractual kag casual positions.
Entitled man sa cash incentive ang mga personnel sang Armed Forces of the Philippines (AFP) sa idalom sang Department of National Defense; uniformed personnel sang Philippine National Police, Bureau of Fire Protection, kag Bureau of Jail Management and Penology sa idalom sang Department of the Interior and Local Government; Bureau of Corrections sa idalom sang Department of Justice; Philippine Coast Guard sa idalom sang Department of Transportation; kag ang National Mapping and Resource Information Authority sa idalom naman sang Department of Environment and Natural Resources.
Lakip sa mga kondisyon sa pag-grant sang SRI amo nga dapat regular, contractual, kag casual positions ang gina-okupa sang civilian personnel.
Dapat man nga yara pa sa government service ang personnel as of November 30, 2024.
Kun apat ka bulan pa lamang ang serbisyo as of Nov. 30, may yara man sang prorated SRI nga may nakasaad man nga mga kondisyon.
Pati ang workers sa local government units (LGUs) lakip na sa barangays ang entitled sa pagbaton sang one-time SRI.
Ini nga insentibo amo ang ginahatag sa government workers bilang pagkilala sang ila nga dedikasyon sa paghatag sang mayo nga public service sa pihak sang mga kabudlayan.#
