Padayon pa ang pag-re-evaluate sang Iloilo City Engineer’s Office (CEO) sa kontrobersyal nga P4.1-million nga San Rafael Overpass Improvement Project sa Diversion Road, Mandurriao, Iloilo City.
Sa interview sang Bombo Radyo kay Engineer Dianaline Señoron, head sang Iloilo CEO, iya ginpahayag nga posible nga magdangat na lang sa P2.8-million tubtub P2.9-million ang kabug-usan nga balor sang proyekto.
Kun balikan, sa breakdown sang P4.1 million nga pondo para sa improvement sang overpass, ang pinakamataas amo ang para sa atop kag roof framing nga nagalakip sang pagpinta nga nagalab-ot sa P1.4-million.
Sa kabug-usan, yari ang breakdown:
I. A. Temporary facilities, electrical system, signages, security, project site enclosure—P280,600.00
I. B. Construction Safety and Health Program—P195,200.00
II. Scaffolding and Safety Precaution—P461,763.90
III. Roof and Roof Framing including Painting works—P1,418,170.70
IV. Steel Works—P659,044.00
V. Tile Works—P412,689.40
VI. Repainting Works (existing steel railings)—P137,506.20
VII. Plumbing and Sanitary Lines—P100,723.20
VIII. Electrical Works (LED lights)—P450,000.00
Suno kay Señoron, posible nga sa reevaluation, kuhaon na lang ang plumbing kag sanitary lines nga nagadangat sa balor nga P100,700 sa original nga contract price.
Posible man nga magbuhin ang budget sa steel works nga subong nagadangat sa P659,000.
Matandaan nga nagmandu si Mayor Raisa Treñas sang full review ukon pagrepaso sa amo nga proyekto sa tunga sang pagkwestyon sang mga pumuluyo sang tuman ka daku nga budget.
Ginpa-review man ang halos P800,000 nga balor nga proyekto nga waiting shed sa Katilingban, Molo, Iloilo City kun sa diin nagtupa na lang sa P586,600 ang balor sang proyekto sandig sa pag-evaluate sang Iloilo CEO.
