ILOILO – Ginahulat pa sang Land Transportation Office (LTO) Region VI ang memorandum nagikan sa national government may kaangtanan sa pagpahanugot sang pag-angkas sa motorsiklo.
Sa interview sang Bombo Radyo kay Atty. Gaudioso Geduspan, Assistant Regional Director sang nasambit nga pamunuan, iya ginpahayag nga wala pa sang opisyal nga dokumento ukon guidelines kun paano ipatuman ang angkas-motorsiklo sa maghimata kag magkahagugma, kasal man ukon indi, nga nagapuyo sa isa lang ka balay.
Suno kay Atty. Geduspan, mahimo nga gina-review pa sang National Inter-Agency Task Force kag sang Land Transportation Office Central ang “safety issues” bangud nagakinahanglan pa nga may separator ukon barrier sa tunga sang backrider kag driver.
“Allowed in principle” lang anay ang amo nga mandu suno sa natungdan.
Sa subong, wala pa sang may nadakpan sa Western Visayas kasunod sang pag-apelar sang madamo nga local government units (LGUs) nga ipaiway lang anay ang pagpangdakop bangud ang motorsiklo amo ang masami nga ginagamit sang mga pumuluyo bilang mode of transportation.
