Ma-atrasar na naman ang pagpanghatag sang plastic nga driver’s license cards matapos nga nagpaguwa ang korte sang temporary restraining order nga nagadumili sa Land Transportation Office (LTO) nga magbaton sang plastic cards halin sa nagdaog nga bidder.
Matandaan nga sang Hulyo, nag-anunsyo ang Department of Transportation (DOTr) nga magabalik na sa Septyembre ang suplay sang plastic nga identification cards (IDs) matapos nga naka-deliver na ang Banner Plasticard Incorporated sang inisyal nga 5,000 pieces.
Apang wala nag-deliver sang dugang ang kumpaniya kag gin-untat man sini ang produksyon bangud sang TRO nga gin-isyu sang Quezon City Regional Trial Court Branch 215 nga nagapa-untat sang kontrata sang ahensya sa amo nga kumpaniya.
Ini matapos nga nag-file sang reklamo sa korte ang napierde nga bidder nga amo ang AllCard Incorporated.
Suno sa korte, wala gin-athag sang LTO kun ngaa nga gin-disqualify ang AllCard apisar pa nga amo ini ang may pinakamanubo nga gin-bid.
Nagrason naman si LTO chief Vigor Mendoza nga transparent man ang opisina kag nagpaathag na sila nga nagaka-atrasar masami ang All Card sa ila nga kontrata sa iban nga ahensya sang gobyerno.
Una naman nga ginpahayag sang LTO nga isa ka milyon nga plastic cards ang i-deliver kuntani sa Septyembre, kag yara pa lamang sa 125,000 ang nahatag sang Banner PlastiCard antes ginpaguwa ang TRO.
Suno pa sa pamunuan sang LTO, apisar pa valid lamang ang TRO sa sulod sang 20 ka adlaw, maga-hingyo gihaapon ang ahensya sa korte nga i-lift ini gilayon. #
