Nagsugod na sa pagpanglimpyo sang mga debris ang otoridad kag ang komunidad sa lapta-lapta nga bahin sang United Arab Emirates kasunod sang maragtason nga kadamulon sang pag-ulan nga nagtuga sang lapnagon nga baha kag naghalit pa sa mga puluy-an, negosyo, kag sektor sang transportasyon.
Indi pa klaro subong kun ano ka daku nga halit ang nabiln sang kalamidad apang doble-panikasog ang emergency workers nga mapahubas ang tubig-baha sa mga dalanon apisar nga Martes pa nag-untat ang mabunog nga pag-ulan.
Ini ang ginakabig nga pinakabaskog nga pag-ulan sa United Arab Emirates sa sulod sang 75 ka tuig suno sa meteorological authorities.
Suno pa sa National Center of Meteorology sa Abu Dhabi, ini nga sahi sang ulan ang naglapaw sa records halin sang 1949 sang ang area ang kabahin pa lamang sang British protectorate nga Trucial States kag antes pa man nadiskubre ang langis!
Isa man ka tawo ang na-report nga napatay sa syudad sang Ras Al Khaimah samtang sa kaiping naman nga pungsod sa Oman, ginpahayag nga malapit na sa 20 ang patay.
Nahibaluan nga kulang ang United Arab Emirates sa mga kinahanglanon nga drainage infrastructure agud nga malikawan kuntani ang kaangay sini nga mga senaryo kun mag-ulan.
Ini bangud isa ini ka disyerto nga nasyon kag tuman gid lamang ka laka ang pag-ulan sa sulod sang isa ka tuig.
May mga impormasyuon nga may pito ka cloud seeding operations nga ginpatigayon antes ang malala nga pag-ulan, apang suno naman sa climate scientists, ang pag-init sang temperatura sa kalibutan dala sang climate change ang nagatuga sang sini nga weather events lakip ang tuman ka damol nga pag-ulan. #
Photo: Reuters
