ILOILO CITY- Liwat nga limitahan ang pagbaligya sang makahulubog nga ilimnon sa mga bars sa Iloilo City sa tubtob na lang sa tungang-gab-i kag epektibo ini gilayon.
Sa interview sang Bombo Radyo kay Mr. Nestor Canong, head sang Task Force on Morals and Values Formation, iya ginpahayag nga ini ang mando ni Iloilo City Mayor Jerry Treñas kasunod sang iya pagpatawag sa mga tiglawas sang mga resto bars kag mga katapo sang Iloilo City Police Office.
Suno kay Canong, nakit-an sa data nga umpisa sa bulan sang Mayo tubtob Hulyo, madamo sang kinagamo nga narekord sa mga balay – ilimnansa tion sang kaagahon kag may mga involved pa nga mga bouncers kag ini ang ginkaalarma sang alkalde.
Gin-athag naman ni Canong nga indi apektado ang operasyon sang mga bars bangud mahimo sa gihapon magserbe sang mga pagkaon kag mahimo gihapon magbaton sang customer tubtob sa kaagahon.
