ILOILO CITY – 50% lang anay sang Public Utility Vehicles ang makabyahe sa tion nga ipauntat na sa Mayo 1 ang Enhanced Community Quarantine sa syudad sang Iloilo.
Sa interview sang Bombo Radyo kay Prof. Elisa Baliao, isa sa mga proponent sang exit plan, iya ginpahayag nga mangin amat-amat lang ang pagpatuman sini agud nga makabalik naman sa trabaho ang mga empleyado.
Suno kay Baliao, may yara sang tatlo ka Phase sa pagpatuman sang exit plan tubtub nga mabalik sa kinaandan ang sitwasyon.
Ginpahayag ni Baliao nga kadungan sang gradual lifiting sang Enhanced Community Quarantine, amat-amat naman nga ibalik ang byahe sang Public Utility Jeepney kag Taxi apang may yara sang limitasyon.
Sa pagpaathag sang natungdan, walo lang ka pasahero ang pahanugutan nga makasakay sa Jeep samtang duha naman ang sa Taxi kag indi pagpasakyon ang mga wala nagasuksok sang face mask.
Antes magsakay sa Jeep, nagakadapat anay nga magbayad ang pasahero direkta sa driver kag indi na kinahanglan nga ipalihog sa kasubong nga pasahero.
Sa subong, may ginaduso nga jeepney stops kun sa diin mahimo nga magbantay ang mga pasahero agud nga malikawan ang pagdinaguso.
Ginakalipay sang transport sector ang ginaduso nga pagbalik sang byahe sa Mayo 1.
Sa interview sang Bombo Radyo kay Raymundo ‘Boyet’ Parcon, presidente sang Iloilo City Loop Alliance of Jeepney Owners and Drivers Association, iya ginpahayag nga isa ka maayo nga lihok ang ginaduso sang Ad Hoc Committee.
Suno kay Parcon, indi man mahinago nga madamo ang nadulaan sang trabaho bangud sa ginapatuman nga lcokdown kag lubos nga naapektuhan amo ang mga driver.
Ginpahayag ni Parcon nga isa ka maayo nga balita nga 50% sa mga driver ang mahimo na nga makabyahe apang ila ginhingyo sa Land Transportation Franchising and Regulatory Board nga kun mahimo, 100% na lang ang pahanugutan nga makabyahe bangud nga ginbuhinan naman ang passenger capacity.
Sa subong, nagalaum na lang sila sa transport sector nga mangin maayo na ang sitwasyon pag-abot sa Mayo 1.
