ILOILO – Aprubado na sang Branch 33 ni Hon. Judge Theresa Enriquez-Gaspar ang pagpabalik sa normal sang byahe sang mga pumboat nga nagabyahe Iloilo-Guimaras vice versa.
Sa interview sang Bombo Radyo kay Atty. Eugenio Original iya ginpahayag nga gina tugutan na nga uyatan ukon indi pagsuksukon sang mga pasahero ang life jacket, mahimo naman nga bukladon ang mga trapal sang mga motorbanca, ginbalik man sa normal ang byahe humalin sa alas sais sa aga tubtob ala sais sang gab-i, tugutan naman nga ibalik ang kapasidad sa pagpasakay sa mga motorbanca kag man magapabilin man nang daan nga desinyo sang mga sakayang pandagat nga naga byahe Iloilo-Guimaras vice versa.
Suno kay Original, ang nasambit nga memorandum ang epektibo na subong nga adlaw sa pihak sang ginpagwa man nga pagsulundan sang MARINA 6 natuhoy sa byahe sang mga motorbanca matapos ang natabo nga Iloilo Strait Tragedy sang Agosto 3.
Nagpalab-ot naman sang pagpasalamat si Atty. Vicente De Asis sa tanan nga yara sa likod sang ila nga pagpakigbato sa kinamatarong sang mga Guimarasnon kag iban pa nga mga pasahero.
Ginpasalamatan man sang natungdan ang media nga nagbulig sa pagpalapnag sang ila nga kawsa.
