ILOILO – Hugot nga ginapatuman sa Brgy. Don Esteban, Lapuz Iloilo City ang pagpang dakop sa mga layaw nga ido kag mga ilaga nga ginakabig naga tuga sang halit kag nagabutang sa peligro sa ikaayong lawas sang mga pumuluyo.
Sa interview sang Bombo Radyo kay Kagawad Efren Senaryo sang nasambit nga lugar, kabahin sa inisyatibo sang ila nga barangay, ginapatuman nila ang programa nga may tigulo “Leptospirosis tapnaon, ilaga dakpon, bugas ang solusyon” kun sa diin gina bayluhan nila sang isa ka kilo nga bugas ang kada ilaga nga madakpan kag gina turn over sa ila sang mga pumuluyo.
Suno kay Senaryo, ang bugas nga ila ginapanghatag nagikan mismo sa bulsa sang ila nga kapitan bangud ginaduso niya ang pagmentenar sang katinlo sa ila nga lugar.
Dugang sang natungdan, isa man ka rason kun ngaa hugot nga ginapatuman ang nasambit nga programa sa ila nga barangay amo agud malikawan nga ma apektuhan sang leptospirosis ang mga pumulyo bangud man masami nga naga baha sa ila nga lugar kun sa diin sa higko sang ilaga nagahalin ang nasambit nga balatian.
Nagpasalig si Senaryo nga may yara sila sang lugar kun sa diin nila gindispose ang mga ilaga nga gina turn over sa ila.
Samtang may kaangtanan naman sa mga ido nga indi na masarangan tatapon sang ila mga tag iya, agud malikawan nga mangin layaw ini mahimo man nila ma turn over sa barangay kun sa diin sila magapirma sang waiver kag pagabayluhan ini sang tatlo ka kilo sang bugas.
Paga pick upon naman sang City Veterinarian ang mga ido nga gina turn over sa ila agud mapangitaan sang bag o nga tag-iya.
