Gindepensahan sang Presidential Security Group (PSG) ang paggamit ni President Ferdinand Marcos Jr. sang presidential chopper sang nagtambong ini kag si First Lady Liza Araneta Marcos sang concert sang British rock band nga Coldplay sa Philippine Arena sa Bocaue, Bulacan.
Ini matapos nangin sentro ini sang kontrobersiya bangud sa pa-chopper sini sang nagtambong sang konsyerto samtang nga ang iban naman nga Pinoy ang nanagil-ot sa nagapug-ok nga trapiko agud lamang makaabot sa venue sang Byernes sang gab-i, Enero 19.
May nagmuno man nga 32 kilometros gid lamang ang kalayuon sang Malacañang pakadto sa venue gani indi na nagakadapat ang paggamit pa sang chopper.
Suno naman kay Maj. Gen. Nelson Morales, commander sang PSG, lab-ot sa 40,000 ka mga indibidwal ang nagdugok sa Philippine Arena agud magtambong sa concert rason nga may problema sa trapiko.
Bangud ang amo nga sitwasyon sang trapiko ang posible may pamahog sa seguridad sang presidente, nag-desisyon ang Presidential Security Group nga gamiton na lamang ang presidential chopper.
Para ini sa proteksyon sang presidente suno kay Morales gani nagpangabay ini sa publiko nga hangpon man ang sitwasyon.
Sa concert sang Coldplay, mangin ang lead singer nga si Chris Martin ang nagmuno man sa mabug-at nga trapiko kag nagpasalamat sa ila fans sa pagkadto apisar pa sang amo nga sitwasyon.#
