ILOILO CITY – Mas nangin maayo na ang sitwasyon sang mga evacuees sa hotel matapos naapektuhan sang oil spill sang naglupok ang power barge sang AC Energy sa Bo. Obrero, Lapuz, Iloilo City.
Sa interview sang Bombo Radyo kay Rocelyn Robles, isa sa mga evacuees, iya ginpahayag nga lima na ka mga hotel sa syudad sang Iloilo ang gindal-an sang mga apektado nga residente.
Suno kay Robles, ginabanta nga magalawig sang lima ka adlaw ang ila pagtinir sa hotel apang ini ang nakadepende pa sa desisyon sang AC Energy.
Ginpahayag ni Robles, isa ka pamilya ang nagatinir sa isa ka hotel room apang ginadul-ungan lang sila sang pagkaon kun sa diin ang nasambit man ang kompaniya ang nagagasto.
Matandaan nga ang nasambit nga lihok sang AC Energy ang kasunod sang pagkadismaya ni Iloilo City Mayor Jerry Treñas may kaangtanan sa kahimtangan sang mga apektado nga residente sa mga evacuation centers.
Nahibalu-an nga lakip sa mga hotel nga ginsayluhan sang mga evacuees amo ang Diversion 21, Courtyard by Marriott, Richmonde, Zuri kag District 21.
May kaangtanan diri, ginkalipay naman ni Mayor Jerry Treñas nga ginsaylo na sa lima ka hotel ang mga apektado nga residente.
Suno kay Treñas, nagakadapat lamang nga gastuhan sang AC Energy ang akomodasyon sang mga evacuuees bangud nga maathag nga may yara sang kapabayaan ang kompaniya.
Ginpahayag ni Treñas nga may yara na sang initial findings ang City Legal Office tuhoy sa criminal charges nga ipasaka batok sa AC Energy apang indi naman magpahilabot ang Iloilo City Government tuhoy sa legal actions nga ipasaka sang iban pa nga ahensya sang gobyerno tuhoy sa natabo nga oil spill.
