ILOILO CITY – Wala sang dapat kabalak-an ang mga pumuluyo sang Brgy. Tabuc Suba, La Paz, Iloilo City bangud nagatuman sa quarantine protocol ang pamilya sang COVID-19 positive nga doktor nga nagatrabaho sa St. Paul’s Hospital of Iloilo.
Sa interview sang Bombo Radyo kay Marilyn Payunan, punong barangay sa amo nga lugar, iya ginpahayag nga nakapauli matuod ang doktor sa ila balay sang Hunyo 25 apang wala na ini sang iban pa nga ginkadtuan.
Suno kay Payunan, napaidalom naman sa rapid test ang pamilya kag wala anay subong ginapa-gwa sa ila balay.
Ginkumpirma man sang punong barangay nga maayo na ang kondisyon sang doktor kag nagapabilin sa quarantine facility apisar asymptomatic.
Magluwas sa amo nga nagpositibo, may yara man sang tatlo ka taga-Tabuc Suba nga gwardya nga nagaduty sa St. Paul’s Hospital of Iloilo.
Ginpahayag ni Payunan nga nakuhaan na sang swab sample ang amo nga mga gwardiya kag gin-isolate sa quarantine facility sang ospital.
