MALACAÑANG – Daku nga sahi sang kurapsyon ang Pastillas scheme rason nga ginpahalin ni Presidente Rodrigo Duterte ang tanan nga opisyal kag empleyado sang Bureau of Immigration nga naulamid sa bribery agud makasulod sa pungsod ang mga illegal nga empleyado sang Philippine Offshore gaming operations.
Suno kay Presidential Spokesperson Salvador Panelo, indi mahimo palampason ni Presidente Duterte ang Pastillas scheme.
Ginpahayag ni Panelo nga wala sang “sacred cows” sa administrasyon, sin-o man nga opisyal ang makasala ang nagakadapat nga magpangatubang sang nagakaigo nga silot.
Sa masunod nga Cabinet meeting, pagaistoryahan nila ang ginapahayag isyu sang bribery sa Immigration.
Nahibaluan nga pila sa mga ginpangangalanan sang Senate witness sa hearing nga ginapahayag may partisipasyon sa pastillas scheme amo sanday Totoy Magbuhos, Deon Albao (alias Nancy), Paul Borja (alias Lisa), Anthony Lopez kag Dennis Robles.
Mangin si anay Travel Control and Enfocement Unit heads nga sanday Bien Guevarra, Glenn Comia kag Den Binsol ang ginapahayag imbolbado man sa nasambit nga isyu.
Nagpasalig naman ang chairperson sang komite nga si Sen. Risa Hontiveros nga mahatagan sang immunity si Immigration Officer Allison Chiong bangud lehitimo nga testigo siya para sa importante nga kaso.
Ini matapos nga gin-ako ni Chiong nga may yara na siya sang nabaton nga pagpamahog humalin sang naghatag siya sang impormasyon may kaangtanan sa bayaran sa Bureau of Immigration nga nagikan sa mga dumuluong nga Chinese.
