Masobra 16,000 ka Ervebo vaccine ang nag-abot na sa Democratic Republic of Congo kasunod sang nagapadayun nga paglapta sang Ebola Virus sa nasambit nga lugar.
Suno sa World Health Organization, ginapaabot pa ang 70,000 doses sang nasambit nga vaccine ilabi na nga ginakabig na ang Ebola outbreak sa Congo subong nga 2026 ang pinakamalala kag ‘fastest growing’ outbreak sa pungsod, matapos ang paglapta sang kaangay nga sakit sang mga nagligad nga tuig.
Gin-atake sang virus ang north kag east region sang Congo kun sa diin ginapahayag nga indi maayo ang government services kag limitado man ang healthcare facilities para sa mga residente.
Sa pinakaulihi nga data sang Congolese authorities, yara na sa 5,290 ang kumpirmado nga apektado sang virus, samtang masobra na 2,000 ka mga indibidwal ang ginbawian sang kabuhi.
Isa ka pagpanghangkat para sa mga health workers sa Democratic Republic of Congo subong nga nagapadayun ang Ebola Outbreak amo ang mismo nga mga residente.
Suno kay senior United Nations Ebola coordinator Julien Harneis, kadam-an sa mga pumuluyo sang nasambit nga lugar ang wala nagapati nga matuod ang Ebola Virus.
Ginpakigbahin niya nga madamo sa mga health workers ang gina-atake sang mga kabataan, ginapang-sunog ang mga rescue vehicles, kag ginaguba ang mga healthcare facilities.
Pahayag ni Harneis, sugod sang nag-umpisa liwat ang paglapta sang nasambit nga sakit, 260 na ka mga healthworkers ang nakabatun sang pag-atake, samtang walo sa mga ini ang hungod nga ginpatay.
