Pabor si President Ferdinand Marcos, Jr. sa pagtukod sang Department of Disaster Resilience (DDR).
Kasunod ini sang pagtay-og sang magnitude 7 nga linog sa Luzon nga nag-resulta sa halit sa mga building kag kamatayon sang lima ka mga tawo.
Suno sa presidente, hingyuon niya sa Kongreso nga magpasar sang layi agud makatukod sang DDR ilabi na bangud disaster-prone ang Pilipinas.
Ginpahayag man sini nga makabulig ang amo nga ahensya agud nga maka-preparar ang pungsod sa climate change.
Matandaan nga sa iya nga State of the Nation Address (SONA), gin-muno ni President Marcos nga madamo nga lugar sa Pilipinas ang yara sa mataas nga risgo bangud sa pagsaka sang lebel sang tubig-dagat bangud nagataas man ang global temperature.
Kun balikan, sa 18th Congress, may mga senador nga nagpamatok sa pagtukod sini nga departamento kag nagpanugyan nga pabaskugon lang kun ano ang existing nga departamento.
Matandaan nga nagpahayag anay si former senator Panfilo Lacson nga kun may tukuron nga bag-o nga department, at least P1.5 billion ang gastuhon, binilyon ang kinahanglan para sa sweldo, capital outlay, kag operational expenses. ##
