Isa-isahon ni Iloilo City Lone District Rep. Julienne “Jamjam” Baronda ang mga distrito sa syudad sang Iloilo para sa pagpatigayon sang pagsinapol kaangot sa problema sa baha.
Sang Myerkules sang gin-una ang ‘People’s Meeting’ sa distrito sang Jaro kun sa diin nagtambong ang barangay officials sang kada barangay sa distrito.
Gin-istoryahan ang status kag development sang Comprehensive Drainage Masterplan amo man ang nagapadayon nga flood control projects.
Kaupod sa amo nga pagsinapol ang mga tiglawas sang national agencies lakip ang Department of Public Works and Highways (DPWH), Department of Interior and Local Government (DILG), Department of Environment and Natural Resources (DENR), Department of Economy, Planning and Development, National Irrigation Administration (NIA) kag Department of Human Settlements and Urban Development.
Nagkadto man si DPWH-Iloilo City District Engineering Office (ICDEO) head Engr. Roy Pacanan.
Pagkatapos sang Jaro, may naka-schedule naman para sa Molo, City Proper, Mandurriao, Arevalo, La Paz, kag Lapuz.
Tuyo sang amo nga pagtilipon nga mapabakod pa ang koordinasyon kag mangin hayag ang implementasyon sang flood mitigation projects.
