Ginbasura sang korte sa Quezon City ang petisyon ni Atty. Manases “Mans” Carpio nga nagahingyo nga untatan na ang impeachment proceedings batok sa iya asawa nga si Vice President Sara Duterte.
Sa order sang Quezon City Regional Trial Court Branch 81, ginsiling sang korte nga wala ini sang hurisdiksyon sa kaso kag ginbasura ang petisyon ni Carpio para sa prohibition kag iya pangabay para sa writ of preliminary injunction batok kay House Speaker Faustino “Bojie” Dy III, House justice committee chairperson Rep. Gerville Luistro, kag BIR Commissioner Charlito Mendoza.
Ginpahayag man sang korte nga ang mga respondent naga-akto bilang mga opisyal sang House Committee on Justice nga isa ka kapareho nga sanga ukon co-equal branch sang gobyerno.
Gindugang sang korte nga ang kaso dapat kuntani ginpasaka sa Supreme Court.
Matandaan nga naghingyo si Carpio nga ipa-untat ang proceedings sa Kamara kag punggan ang pagpagwa ukon paggamit sang tax records nga ginapangayo sang justice committee may kaangtanan sa impeachment case.
Apang sabat sang korte, wala naga-abuso sang poder ang House committee kundi nagausar lamang sang awtoridad nga ginahatag sang layi.
Base sa Konstitusyon suno sa korte, ang Kamara ang may yara sang “exclusive power” sa pagsugod sang tanan nga impeachment cases kag nga ang mga reklamo ginapasa sa nagakaigo nga komite.
Ginpahayag man sang korte nga ang pag-isyu sang subpoena duces tecum ad testificandum isa ka natural nga gahum sang komite nga legal nga gintukod para matuman ang iya constitutional mandate sa pagpadalagan sang hearing. Ang amo sini nga subpoena isa ka mando para mag-atubang kag magtestigo ang isa ka tawo ukon magdala sang dokumento kag records para sa proceedings.
Kun balikan, nagsugod ang petisyon ni Carpio bangud sang subpoena sang House justice panel nga naga-require sang income tax returns kag iban pa nga records halin 2007 tubtob 2025. Gina-insister sini nga nagalapas ini sa privacy kag isa lamang ka “fishing expedition.”
Nag-ugat ini sang ginmanduan sang House justice committee ang BIR nga ihatag ang tax records ni Duterte, Carpio kag mga kumpanya nga may koneksyon sa ila bilang kabahin sang impeachment proceedings.
Sang Abril 29, nagboto ang panel sang 38-6 nga indi anay pag-abrihan ang selyado nga box nga may tax records kag ipabilin ang desisyon sa Senate impeachment court kon magpadayon ang kaso sa trial.
