ILOILO – Natalana na nga ipasa sang Senado ang petition sa Korte Suprema sa masunod nga semana may kaangtanan sa pag-terminate ni Presidente Rodrigo Duterte sang Visiting Forces Agreement (VFA) sang Pilipinas kag Estados Unidos.
Ini nga petition ang may tinutuyo nga athagon ang proseso sang termination kag kun bala kinahanglan anay nga konsultahon ni Duterte ang mga miyembro sang senado antes ibasura ang nasambit nga military agreement.
Sa interview sang Bombo Radyo kay Drilon, iya ginpahayag nga pamunuan ni Senate President Vicente Sotto III ang amo nga petition.
Liwat nga gin-athag ni Drilon nga importante ang amo nga isyu sa VFA bangud madamo ang posible epekto sini sa pungsod.
Suno sa senador, indi mahimo nga gilayon nga i-terminate sang Presidente ang amo nga kasugtanan bangud lamang indi makasulod ang suod sini nga opisyal kag kaalyado nga si Senator Ronald dela Rosa sa America bangud sa kakulang sang visa.
Nagdepensa man si Drilon sa pahayag ni dela Rosa nga una na nga nagpahayag nga mayorya sang mga senador (ukon ang administration senators) ang masami nga kabahin sang minority vote.
Suno kay Drilon, nalipatan ni Dela Rosa nga personal nga gin-sponsor ni Sotto ang Resolution 337.
Suno kay Drilon, bisan sila nga mga senador sa opposition ang nagpirma man sa amo nga resolution.
Nahibaluan nga sa ginpatigayon nga voting sa senado, dose ang nagpabor sa pagpasa sang petition kag pito naman ang nag-abstain.
Ang mga nag-abstain amo ang kaalyado sang administrasyon nga sanday Senator Ronald Dela Rosa, Christopher “Bong” Go, Imee Marcos, Aquilino Pimentel III, Ramon Revilla Jr., Francis Tolentino kag Cynthia Villar.
