Nakahimo sang maragtas ang Philippine men’s football team matapos ini naka-abante sa semifinals sang Southeast Asian (SEA) Games sa labing-una nga tion sa sulod sang masobra tatlo ka dekada.
Natabo ini matapos ang 1-0 nga kadalag-an batok sa 2023 gold medalists nga Indonesia sa 700th Anniversary Stadium sa Chiang Mai, Thailand.
Ang naka-goal sa national team amo si Otu Banatao antes magtakop ang half-time.
Na-sweep sang Pilipinas ang Group C matapos ang una nga 2-0 nga score batok sa Myanmar sa imbuka nga kumpetisyon sang Byernes.
May tyempo pa nga makapahuway ang players sang pungsod antes ang semifinals sa Disyembre 15 sa Bangkok.
Daku ini nga pagbangon para sa Pilipinas matapos mapaslawan nga makadaog sang 2023 sa Phnom Penh, Cambodia kun sa diin naka-record ini sang isa ka draw kag tatlo ka kalutusan.
1991 pa sang katapusan nga nakalab-ot ang Pilipinas sa final four sang SEA Games, apang napaslawan man ini nga makabulsa sang medalya sang amo nga tion matapos ginlutos sang Singapore, 2-0, sa bronze medal match.
