Nagapaabot ang PhilHealth nga makapagwa ini sang P378 bilyon tubtob P400 bilyon para sa health insurance benefits subong nga 2026.
Ini kasunod sang padayon nga pagpasangkad sang subong nga administrasyon sa mga healthcare coverage para sa mga Pilipino.
Nagalakip ini sang dako nga benepisyo para sa mga miyembro nga padayon nga nagabayad sang ila kontribusyon.
Suno kay PhilHealth Acting Vice President for Corporate Affairs Mae Villa, dako ang gindugang sa mga benepisyo nga ginahatag sang ahensya apisar wala ginbag-o ang premium contribution rate.
Ginalauman man nga ang nasambit nga payout amo ang pinakamataas sa kasaysayan sang PhilHealth.
Nagsunod ini sa panawagan ni Executive Secretary Ralph Recto nga dugangan ang benepisyo sang mga miyembro nga pirmi nagabayad sang ila kontribusyon agud mabatyagan nila ang balor sang ila ginabayad kada tuig.
Ginpahayag man ni Villa nga base sa Universal Health Care Law, ginpasaka sang PhilHealth ang mga benepisyo sang 30% sang 2024 kag dugang nga 50% sang 2025, nga nagresulta sa 95% nga kabilugan nga pagtaas.
