ILOILO CITY- Gin-ako sang Philippine Coast Guard nga indi tanan nga mga kontrabando ang ila gid ma-monitor kag mapunggan nga makasulod sa Western Visayas.
Sa interview sang Bombo Radyo kay Lt. Commander Jansen Benjamin, spokesperson sang Philippine Coast Guard District Western Visayas, iya ginpahayag nga nagapangita man sang paagi ang iban nga involved sa iligal nga buluhaton pareho sang illegal drug trade kun sa diin wala nagaagi ang mga in sa mga ports kundi sa mga lugar nga mahimo madungkaan kag wala sang nagabantay nga otoridad.
Apang suno kay Benjamin, sa bahin sang ila pagbantay sa mga pwerto, apisar random lang ang ila pagpatigayon sang inspection, sa masami, ginahimo nila ini kun may nabaton sila nga mga intelligence information nga kalabanan nagaresulta gid sa kumpiskasyon sang druga kag pagkaaresto sa mga drug personalities.
Ginpasiguro naman sang natungdan nga operational man ang x-ray machine sa mga pwerto kag may yara man sang mga K-9 units nga 100% nga maka-detect gid sang illegal drugs.
Gindugang man ni Benjamin nga may koordinasyon man sila sa iban nga ahensya kaangay sang Philippine Drug Enforcement Agency, Philippine Ports Authority kag Philippine National Police agud mas mangin hugot ang pagbantay batok sa nagapalusot sang iligal nga druga sa rehiyon.
