Nagpaandam ang Philippine Space Agency nga posible magtupa sa West Philippine Sea ang pila ka mga parte sang Chinese rocket nga Long March 7 nga ginpalupad sang China san Enero 17 sa Wenchang Spacecraft Launch Site sa Wenchang, Hainan.
Lakip sa ginmensyonar sang ahensya nga drop zones ukon ang posible mahulugan sang debris amo ang malapit sa Bajo de Masinloc kag Cabra Island.
Ginpahayag man nga bisan wala sang nagapuyo sa areas nga posible tup-an sang debris, delikado gihapon ini sa safety sang mga barko, aircraft, fishing boats, kag iban pa nga sakayan nga maglabay sa drop zone.
May posibilidad man nga maglutaw ang debris kag makit-an sa kaiping nga mga baybayon gani nag-abiso ang ahensya nga pahibaluon gilayon ang otoridad pananglitan may masiplatan nga ginasuspetsahan nga debris.
Ginapaandaman man ang publiko nga indi gid magpalapit ukon magtandog sa suspected debris bangud may bilin pa ini nga toxic substances kaangay sang rocket fuel.
Sang Disyembre, nagpalupad man ang China sang rocket kun sa diin ang iban nga parte sini ang ginpatihan nga nahulog man sa West Philippine Sea.
Suno kay PhilSA Space Technology Missions & Systems Bureau director Marc Talampas, kun magpalupad sang rocket halin sa Wenchang Space Launch Center, ginalauman na nga sa coastal waters sang Pilipinas magatupa ang pila ka parte sang rocket.#
