ILOILO CITY- Kumpiyansa ang Iloilo Provincial Health Office (PHO) nga mas manubo ang tsansa nga may matabo nga latnanay sang COVID-19 sa adlaw sang eleksyon sa pila ka mga banwa sa probinsya sang Iloilo.
Sa interview sang Bombo Radyo kay Dr. Ma. Socorro Quinon, head sang PHO, iya ginpahayag nga lakip sa sini nga mga banwa nga masobra sa 90% na sang pumuluyo ang nabakunahan amo ang Zarraga, Balasan,Lemery,Bingawan, Batad,Barotac Viejo, Concepcion, Banate, Barotac Guimbal, Mina kag Duenas.
Samtang, gin-ako naman ni Quinon nga nabalaka ang PHO bangud nga wala pa nakalab-ot sa herd immunity kun sa diin yara pa lang sa masobra 60% sang populasyon ang bakunado.
Ini ginalakipan sang Estancia, Lambunao, Miagao, Alimodian, Tigbauan, Maasin, Passi City, Badiangan, Oton, kag Leon.
Suno kay Quinon, bangud madamo pa ang wala nabakunahan kag indi man required nga vaccinated ang mga botante, mas maayo nga mag-obserbar sa gihapon sang health protocol kaangay sang physical distancing, pagsuksok sang face mask kag paglikaw nga magtinir sa lugar nga madamo sang tawo.
