ILOILO – Padayon nga ginamonitor sang Provincial Health Office ang sitwasyon sang COVID-19 sa probinsya sang Iloilo.
Sa interview sang Bombo Radyo kay Dr. Patricia Grace Trabado, chief sang Provincial Health Office iya ginpahayag nga ang gobernador mismo ang nagamonitor sa sitwasyon kag sa tanan nga mga kinahanglanon sang probinsya agud malikawan nga maglapta ukon makasulod man ang nasambit nga balatian sa probinsya.
Suno kay Trabado, dako man ang katungdanan sang mga Municipal kag barangay officials bangud sila mismo ang makamonitor malapit sa mga pumuluyo nga posible makitaan sang simtomas sang COVID-19.
Dugang sang natungdan, nagakadapat nga nagahulag man ang Barangay Health Emergency Team sang kada barangay nga mangin kabulig sang mga opisyal sa pagbantay.
Sa subong may yara nalang sang 18 ka person under monitoring sa probinsya.
Liwat man nga nagpanugyan si Trabado sa mga paagi kun paano malikawan ang COVID-19 kaangay nalang sang pagtabon sang baba kun magbahing kag regular nga paghugas sang kamot.
