ILOILO CITY- Liwat nga gina-engganyo sang Iloilo Provincial Health Office ang mga pet owners nga mangin responsable kasunod sang pagtaas sang kaso sang animal bite.
Base sa data sang opisina, sa una nga anom ka bulan, may yara sang 24,682 ka mga kaso kag may duha na nga patay.
Sa interview sang Bombo Radyo kay Dr. Ma. Socorro Quinon, pinuno sang Iloilo Provincial Health Office, iya ginpahayag nga kalabanan sa mga kaso ang ginkagat mismo sang ila kaugalingon nga mga hinuptanan kag pila ka beses nga nagakatabo.
Suno kay Quinon, kinahanglan gid sang mga pet owners nga hatagan sang anti-rabies vaccines ang ila hinuptanan, kag indi pagpabay-an nga makigsimpon sa iban nga sapat kun sa diin sila mahimo malatnan sang rabies.
Nahibaluan nga ang Department of Health kag ang Iloilo provincial government ang nag- procure sang anti-rabies vaccines apang ginakulang man ang supply sini.
Base man sa data,ang masunod nga district hospitals ang may pinakamataas nga numero sang treated animal bite cases subong nga tuig: Iloilo Provincial Hospital sa Pototan – 2,105; Don Valerio Palmares Sr. Memorial District Hospital sa Passi City – 1,804; Rep. Pedro G. Trono Memorial Hospital sa Guimbal – 1,634; Ramon D. Duremdes District Hospital sa Dumangas – 1,576; kag Ramon Tabiana Memorial District Hospital sa Cabatuan – 1,349.
Sa animal bite treatment centers sa rural health units , ang masunod nga banwa ang may pinakamataas nga numero sang treated animal bites: Santa Barbara – 1,234; Oton – 1,151; Pavia – 919; Carles – 829; Zarraga – 830; kag San Joaquin – 851.
