ILOILO CITY – Ginabanta nga naglab-ot sa 48,000 ka litro ang nauyang matapos nga naglupok ang power barge sang National Power Corporation sa Zone 3, Bo. Obrero, Lapuz, Iloilo City.
Sa interiew sang Bombo Radyo kay Punong Barangay Ricardo Diño Jr., iya ginpahayag nga 30-40 ka pamilya ang gin-evacuate sa Bo. Obrero Elementary School bangud sa tuman ka baho nga leak gikan sa power barge.
Suno kay Diño, ginabanta mga 3:20 kaina sang hapon, Hulyo 3, sang may nabati-an sila nga matunog nga lupok.
Ginpahayag ni Diño nga apisar nga may suksok nga face mask, mapanimahu-an sa gihapon ang tuman ka baho nga langis ilabi na sa Zone 3.
Ginabanta nga naglab-ot sa 200,000 ka litro ang karga sang power barge kun sa diin 1,200 sq. meters ang apektado sang oil spill.
Sa subong, ginkordon na ang lugar agud nga wala sang may makasulod kag nagbuligay ang mga personnel sang Bureau of Fire Protection, Philippine Coast Guard, City Disaster Risk Reduction and Management Office kag sang City Environment and Naural Resources Office agud nga indi na madugangan ang halit.
