Gin-imbitar sang France ang Pilipinas nga magpasakop sa isa ka major multinational exercise nga pangunahan sini sa tuyo nga mapabaskog pa ang security partnerships sa rehiyon.
Ang nagpalab-ot sang pagpangagda sa Marara Exercise 2024 amo si Rear Admiral Geoffroy d’Andigné, commander sang French Armed Forces in the Asia-Pacific.
Suno sa French embassy, nagkitaay ang amo nga opisyal kag si Defense Secretary Gilberto Teodoro Jr. sa isa ka meeting sang nagligad lang nga semana kag didto ginpalab-ot ang imbitasyon.
Ang iya nga pagbisita ang kadungan man sang stopover sang French destroyer nga FNS Lorraine nga naghalin lamang sa Manila sang Huwebes matapos ang isa ka semana nga port call bilang kabahin sang inaugural deployment antes ang formal commissioning.
Ang Marara exercise sa French Polynesia ang nagatingob sang partner countries sa Pacific agud mapaayo pa ang kapasidad sa disaster response kag iban pa nga contingencies.
Matandaan nga nagpadala man ang France sang observers sang ginhiwat ang Balikatan kag Sama-Sama exercises sang Armed Forces of the Philippines.
Sang Mayo, nagpadala man ang Pilipinas sang mga observers sa 12 ka adlaw nga Croix du Sud ukon Southern Cross, isa ka multinational exercise nga nakatutok sa disaster crisis management sa New Caledonia, isa ka French territory sa South Pacific.
