Naguwa sa survey sang isa ka analytics firm sa Amerika nga isa ang Pilipinas sa mga pungsod nga may pinakamataas nga “positive experiences” sang 2022.
Suno sa 2023 Gallup Global Emotions Report, patas ang skor sang Pilipinas sa Indonesia, Mexico, Paraguay, kag Vietnam nga lunsay 85 sa positive experience index.
Nagasunod ang Guatemala kag Panama nga may 84 kag ang El Salvador nga 83.
Ang may pinakamanubo naman nga skor amo ang Afghanistan nga 34 sa global index.
Ini nga Positive kag Negative Experience Indexes sang amo nga analytics firm ang ginkuha paagi sa emosyon kag balatyagon sang respondents nga ila gin-angot sa ila nga perceptions sang living standards, personal freedoms, kag presensya sang social networks.
Halin sa zero to 100 ang index scores; kun mas mataas ang skor, buot silingon, mas mataas man ang positibo nga emosyon sa amo nga pungsod.
Gin-conduct ang survey paagi sa telephone ukon face-to-face interviews sa masobra 147,000 adults sa 142 ka mga pungsod kag areas.
