Nakigbahin na ang Pilipinas sa ginapatigayon nga pagtuon sang World Health Organization nga may katuyuan nga mangita sang bulong sa pandemic nga Coronavirus Disease 2019.
Suno kay Department of Health Sec. Francisco Duque III, ginpadala na sa “Solidarity Trial” sang World Health Organization si Dr. Marissa M. Alejandria sang Philippine Society of Microbiology sang Infectious Disease bilang tiglawas sang Pilipinas.
Makaupod man niya si Department of Health Usec. Maria Rosario Vergeire bilang official liason sang Department of Health sa World Health Organization.
Madumduman nga sang Marso 18 sang ginsugudan sang World Health Organization ang global solidarity trial matapos ang ginpatigayon nga genetic sequencing sang China.
Pila sa mga pungsod nga una na nga nakigbahin sa nasambit nga pagtuon amo ang Argentina, Bahrain, Canada, France, Iran, Norway, South Africa, Spain, Switzerland kag Thailand.
Suno kay Dr. Tedros Adhanom Ghebreyesus, pinuno sang World Health Organization kinahanglan pa nga mag-agi sa isolation, test, treatment kag tracing sang mga pungsod ang COVID-19 agud matapna ukon makontrol ang paglapta sini.
Kun mapabay-an, posible nga magpadayon ang transmission chain apisar sa manubo nga level kag indi imposible nga maglapta pa ini sa tion nga indi matuman ang social distancing measures.
