ILOILO CITY – Nalakip ang Pilipinas sa tatlo ka mga pungsod nga gindugang sang US Centers for Disease Control and Prevention sa “high” risk list para nga padulungan bangud sang COVID-19.
Lakip sa tatlo ka mga pungsod amo ang Pilipinas, Nepal kag Russia nga yara sa Level 3 group.
Buot silingon, yara sa “High Level of COVID-19” ang pungsod suno sa travel health notice nga ginpagwa sang CDC.
Suno sa top health agency, dapat nga mangin updated ang COVID-19 vaccines antes ang mag-travel diri sa Pilipinas.
Kun wala sang updated nga COVID-19 vaccines, suno sa CDC, likawan ang magpadulong diri sa Pilipinas.
Ang level 3 category ang naga-apply sa mga pungsod nga may yara sang masobra sa 100 COVID-19 new cases sa sulod sang 28 ka adlaw sa 100,000 ka mga populasyon.
Sa advisory sang CDC, ginapa-andaman ang mga travelers nga ang mga may yara sang updated nga COVID-19 vaccination ang mahimo sa gihapon nga mabutang sa risgo sang pag-acquire ukon paglapta sang COVID-19.
Ang mga naga-edad duha ka tuig kag pataas ang dapat nga magsuksok sang mask sa mga indoor spaces.
Sa amo man nga advisory, kun may yara naman sang mahina nga immune system ukon yara sa risgo nga maka-angkon sang malala nga balitan apisar nga bakunado, istoryahon ang doktor kag ikonsiderar ang pagpa-iway sang pagbyahe sa Pilipinas.
Ang ahensya ang nag-update sang COVID-19 Travel Health Notice system sang Abril.
Ini ang naga-review sang case data nga gin-report sa World Health Organization agud nga matumod ang mga destinasyon nga may yara sang COVID-19 Travel Health Notice level.
Nagdepensa naman ang Department of Health (DOH) nga lain ang ginagamit nga metrics sang CDC sa ginagamit diri sa pungsod.
Sa CDC, ginagamit nila ang incidence rate nga triangulated with the testing data.
Sa Pilipinas, ang numero sang kaso ang wala ginahatagan sang bug-at kaangay sang healthcare utilization.
Sa data, ang severe kag critical infections ang nagapabilin nga manubo sa 1, 000 kag manageable naman ang mga na-admit kag na-preserve ang health-care system capacity.
Sang nagliligad nga semana, ang Pilipinas ang naka-record sang 28,008 nga bag-o nga mga kaso suno sa DOH.
Humalin sa Agosto 1-7, may yara sang average nga 4,001 nga infections sa tagsa ka adlaw, tubtob 3 percent kun ikumpara sa nagligad nga semana.
Sa subong, may yara sang 72.1 million ka mga Filipinos ang fully vaccinated kun sa diin, 17 million ang nakabaton sang booster shot kag 1.8 million ang nakakuha na sang ikaduha nga booster shots.
