ILOILO CITY- Ginlamon sang kalayo ang kapin tatlo ka hektarya sang kahilamonan kag plantation sang mga palma sa Barangay Anilao, Pavia, Iloilo.
Ang duta nga ginluntaran sang sunog ang ginpanig-iyahan sang pamilya Arenas.
Magluwas sa malapad nga mga hilamon, may mga palm trees man nga ginlamon sang kalayo.
Wala pa matumod kon ano ang gin-umpisahan sang grassfire.
Antes sini, isa man ka grassfire ang nagluntad sa isa ka bakante nga lote sa area sang Atria sa Barangay San Rafael, Mandurriao, Iloilo City.
Sa inisyal nga impormasyon, may nanutod sa amo nga lugar.
Ang ginatudlo nga nanutod amo ang nagabantay sa lote.
Suno sa iya, ginpatay man niya ang kalayo apang ginpalid sang mabaskog nga hangin ang baga gani madasig nga naglapta ang kalayo.
Wala naman sang tawo nga nasamaran sa sunog.
Sandig sa rekord sang fire authorities, anum gid ka sunog ang nagluntad sa Iloilo kahapon.
Magluwas sa grassfire sa Anilao, kag sa Barangay San Rafael Mandurriao, may sunog man sa Tabuc Suba, Jaro; Buntatala Jaro; Tacas, Jaro; kag naghingagaw pa ang sunog sa San Antonio, Molo las dose kagab-i.
