Nagapangayo pa sang gamay nga tyempo ang Land Transportation Franchising and Regulatory Board (LTFRB) antes mapanagtag ang subsidiya sa operators kag drivers sang public utility vehicles (PUVs).
Suno kay LTFRB Chairman Teofilo Guadiz III, ang pondo kag ang lista sang mga benepisyaryo sang fuel subsidy program ang napadala na sa Landbank of the Philippines.
Kun wala pa nabaton ang ayuda suno kay Guadiz, posible suno sa natungdan nga may gina-proseso pa ang bangko bangud may yara sang 1.36 million nga mga benepisyaryo.
“What we can assure you is the money is already in the bank, bigyan lang ng konting pagkakataon ang Land Bank para mai-download ‘yung pera,” pahayag ni Guadiz.
Sa idalom sang P3-billion fuel subsidy program, yara sa 280,000 ka public utility vehicles nga maka-benepisyo, 930,000 ang tricycles kag 150,000 ang delivery service units.
Suno sa ahensya, ang drivers kag operators sang kuwalipikado nga modern public utility jeepneys kag Utility Vehicle Express units ang makabaton sang P10,000 samtang ang operators sang iban nga PUVs ang makabaton sang P6,500.
Ang LTFRB ang naga-uyat sang distribusyon para sa subsidies sa jeep, bus, kag taxi operators kag drivers, samtang ang Department of the Interior and Local Government (DILG) naman ang in-charge sa fuel subsidy sa tricycle drivers kag operators.
Sa pihak nga bahin, ang Department of Trade and Industry (DTI) naman ang in charge sa subsidiya para sa delivery drivers. #
