Magatambong si Pope Francis sa summit sang Group of Seven (G7) leaders agud pangunahan ang diskusyon kaangot sa mga pagpanghangkat dala sang Artificial Intelligence (AI).
Ang G7 meeting ang pagahiwaton sa southern Italian region sang Puglia sa Hunyo 13-15 kun sa diin magatipon ang mga lideres sang United States, Germany, Britain, France, Italy, Canada kag Japan amo man ang pila ka espesyal nga invited guests.
Suno kay Italian Prime Minister Giorgia Meloni, ini ang una nga bes nga magapasakop ang isa ka Santo Papa sa kaangay nga aktibidad sang G7.
Antes sini, matandaan nga una na nga nagpaandam ang Santo Papa sa mga halit nga posible dal-on sang AI kag nagpanawagan man ini sang mga regulasyon sa bilog nga kalibutan agud nga magamit ini para sa ikaayo sang tanan.
Ang “legally binding international treaty” agud ma-regulate ang AI amo ang kinahanglan suno kay Pope Francis kag dapat siguraduhon nga indi ma-islan ang human values.
Nagpaandam man ini sa posible matabo nga “technological dictatorship” nga may daku nga pagpamahog sa human existence.
