Nagpanawagan si Pope Francis sa mga tumuluo sa bilog nga kalibutan nga protektahan ang palibot kag dunang manggad.
Sa iya nangin mensahe sa ika-50 nga anibersaryo sang Earth Day, gindayaw niya ang mga environmental movement nga ginapatuman sang mga pungsod sa bilog nga kalibutan bangud ginatudluan sini ang mga kabataan sang importansya sang pag-amlig sa ila palibot.
Suno kay Pope Francis posible nga malampuwasan sang bilog nga pungsod ang pagpanghangkat dala sang pila ka problema may kaangtanan sa palibot kun magbinuligay ang tanan kag maghugpong.
Nagpaandam man ang Santo Papa nga wala sang kapatawaran ang pagpangguba sang mga tawo sa ila nga palibot.
Nahibaluan nga isa si Pope Francis sa mga nagapanguna sa kampanya sa pagprotekta sa palibot.
Nagpanugyan ang United Nations sa gobyerno sa tagsa ka pungsod sa bilog nga kalibutan nga ipatuman ang ila economic responses agud maid-id nga maistoryahan ang may kaangtanan sa climate change.
Sa nangin mensahe ni Antonio Guterres, pinuno sang United Nations kadungan sang ika-50 nga anibersaryo sang Earth Day kahapon, iya ginpahayag nga ang Covid-19 pandemic ang ikaduha sa pinakadako nga krisis nga ginapangatubang sang bilog nga kalibutan matapos ang World War II.
Dugang sang natungdan, wala nagatapos ang problema nga pagaatubangon sang ekonomiya bangud amat-amat man nga naga tuhaw ang environmental crisis.
Nahibaluan nga ginlunsyar na sang pila ka mga pungsod kaangay sang Estados Unidos, China kag European governments ang ila stimulus package apang suno kay Gutteres naka-focus lang ini sa pagbulig sa mga industriya nga apektado sang pandemic sa baylo nga atubangon ang problema sa global depression.
Santo sa pahayag ni Gutteres, nagakadapat nga gamiton sang mga gobyerno ang ila fiscal firepower agud masugudan na ang paggamit sang ‘grey to green’ economy.
Samtang, paagi sa isa ka mobile phone application mahimo nga makakuha sang picture ang publiko kag i-ipload ini sa app agud maghatag sang local data may kaangtanan sa nagkalain-lain nga environmental issues bilang kabahin man sang pagselebrar sang Earth Day.
