Magasapol si Presidente Ferdinand Marcos, Jr. sa hog kag poultry raisers’ groups subong nga adlaw agud ma-address ang problema sa imported kag smuggled pork kag chicken products nga nagabaha subong sa mga merkado.
Suno kay United Broiler Raisers Association kag Philippine Egg Board chairman Gregorio San Diego, matabo ang konsultasyon sa Malacañang alas dos karon sa hapon.
Ini nga stakeholders meeting ang gin-organisar sang National Agricultural and Fishery Council matapos ang konsultasyon sa mga officials sang Department of Agriculture (DA) sa pagpanguna ni Senior Undersecretary Domingo Panganiban.
Ipa-alinton sang hog kag poultry raisers ang ila nga mga problema suno kay San Diego ilabi na bangud padayon ang pagsuprer sang local industry sa tunga sang smuggling kag wala preno nga pagsulod sang imported meat products.
Kun padayon nga imported kag smuggled nga mga produkto ang magasulod sa merkado, posible suno sa natungdan nga mapatay ang lokal nga industriya sang baboy kag manok.
Indi lang baboy kag manok ang involved suno sa natungdan bangud lapnagon ini nga problema sa technical smuggling pati sa iban nga farm products kaangay sang bombay.
Nagapang-alang-alang man si San Diego sa mandu ni Marcos sa Department of Justice (DOJ) kag sa National Bureau of Investigation (NBI) nga lagson ang smugglers, hoarders kag cartel sang agricultural products. Ini bangud apisar halin sa presidente ang mandu, wala man ini sang timeline kag wala sang partikular nga deadline nga ginhatag sa otoridad. #
