ILOILO CITY- Nagpabutyag si President Ferdinand R. Marcos Jr. sang pagpasalamat kay United States (U.S.) Secretary of State Antony Blinken kadungan sang ila panyapon sa State Dining Room sa Malacañan Palace kagab-i.
Nahibaluan nga nagpadulong si Blinken sa Pilipinas bilang kabahin sang iya Asia tour agud magpasalig sang suporta sang US sa mga regional allies batok sa China.
Sa mensahe ni Presidente Marcos, ginsiling sini nga dako nga bagay para sa iya nga ginakabig ni Blinken nga importante ang Pilipinas sa tunga sang mas madamo nga mga isyu nga dapat sini atenderon.
Suno naman kay Blinken, tuman nila nga ginahatagan sang balor ang relasyon sa tunga sang United States kag Pilipinas kag kinahanglan nga mas mabaskog kag mas mapag-on pa ang ila engagement sa Indo-Pacific region.
Sabat naman ni Marcos, dako ang papel sang sini nga engagements para sa pagpabilin sang bukas nga komunikasyon kag kooperasyon.
