ILOILO CITY – Posible nga magabisita anay si President Ferdinand “Bongbong” Marcos Jr. sa Singapore ukon sa Indonesia antes ang iya overseas trip bilang lider sang pungsod.
Suno kay Philippine Ambassador to the United States Jose Manuel “Babe” Romualdez, ang plano nga pagbisita ni Marcos ang himuon antes ang iya posible nga pagbyahe sa Estados Unidos agud nga magtambong sang United Nations’ General Assembly (UNGA).
Ang UNGA amo ang main policy-making organ sang United Nations.
Antes pa man magpadulong sa New York, unahon anay niya ang Indonesia.
Ginakonsiderar man ang Singapore bangud nga may yara man siya sang imbitasyon.
Ginaplano nalang sa Department of Foreign Affairs (DFA) ang nagaka-igo nga tyempo para sa presidente nga magbisita sa duha ka mga ASEAN countries.
Samtang, ang pagpasakop ni Marcos sa UNGA sa New York sa Septyembre ang “more or less confirmed” suno kay Romualdez.
Ginaka-ayo na sang DFA ang schedule ni Marcos base sa iya katapusan nga pagsapol kay Foreign Affairs Secretary Enrique Manalo.
Suno sa iya, gin-confirm na nila si Marcos sa United Nations kag ginaka-ayo na ang schedule bangud madamo man sang imbitasyon nga nabaton ang presidente nagikan sa iban nga mga pungsod.
Lakip sa mga desisyon sini amo ang pag-appoint sang secretary-general, pag-eleher sang non-permanent members sang Security Council kag pag-approve sang UN budget.
Ang Assembly ang nagasapol sa regular sessions halin sa Septyembre tubtob sa Disyembre kada tuig.
Suno naman kay Press Secretary Trixie Cruz-Angeles, sa tion nga magkadto si Marcos sa amo nga event, ini ang labing una nga tion nga makita niya ang iban pa nga world leaders.
Samtang, ginpahayag naman ni Romualdez nga magapakigkita siya sa mga opisyal sang White House sa tion nga makabalik ini sa Washington sa weekend agud nga hambalan ang bilateral meeting ni Marcos kay US President Joe Biden nga himuon man bilang sideline sa UNGA.
Una na nga ginpahayag ni Manalo nga ginalantaw na nila ang petsa nga magasanto sa schedule sang duha ka lideres.
Ini bangud nga nagpahayag si Marcos nga indi niya gusto nga magpadulong sa gwa sang pungsod sang malawig bangud sa mga isyu.
Una naman nga ginpahayag ni US Deputy Secretary of State Wendy Sherman nga mahimo si Marcos nga makapadulong sa Estados Unidos nga indi maaresto bangud sang masobra sa $353-million contempt order batuk sa pamilya niya may kaangtanan sa human rights case.
