ILOILO CITY – Ginkakibot kag ginkasubo ni President Ferdinand Marcos Jr. ang natabo nga shooting incident sa Gate 3 sang Ateneo de Manila University (ADMU) sa C5 Katipunan Avenue, Quezon City subong gid lamang nga hapon kadungan sa graduation ceremony sang ADMU- Law School kun sa diin, tatlo ang napatay.
Ang tatlo ka mga biktima amo sanday former Lamitan City, Basilan Mayor Rose Furigay, ang iya long-time aide nga si Victor Capistrano, kag si Jeneven Bandiola.
Ginapahayag nga ang anak sang anay alkalde ang magradwar kuntani sa law school subong nga adlaw.
Ang suspek amo si Dr. Chao Tiao Yumul kag yara na sa kustodiya sang pulis.
Sa Facebook post sang presidente, ginpasalig niya nga magapatigayon sang maid-id nga imbestigasyon ang law enforcement agencies agud nga mahatagan sang hustisya ang kamatayon sang mga natungdan.
Naghalad naman ini sang pangamuyo para sa mga graduates sang unibersidad, sa Ateneo community kag sa mga residente sang Quezon City kag Basilan.
Ang nasambit nga krimen ang mabaskog nga ginkondenar ni Quezon City Mayor Joy Belmonte kag nagpalab-ot sang pagpakig-unong sa pamilya sang mga napatay.
Nagpasalig naman si Quezon City Police District (QCPD) Chief General Remus Medina nga hatagan sang hustisya ang kamatayon sang mga biktima.
Ang 2022 Commencement Exercises sang Ateneo Law School subong nga adlaw ang ginkanselar kag ginpaidalom na sa lockdown ang unibersidad.
Si Chief Justice Alexander Gesmundo nga amo ang commencement speaker ang nagbalik na gid lamang kag wala nagpadayon sa unibersidad bangud sang krimen.
Bwas nga adlaw, Hulyo 25, patigayunon ang pinakauna nga State of the Nation Address ni President Ferdinand Marcos, Jr.
Pila ka adlaw antes ang SONA, ginpatuman na ang gun ban sa Metro Manila.
Nagdangat naman sa masobra 21, 000 ka mga security personnel ang iga-deploy agud nga magbantay para sa seguridad sang aktibidad.
