ILOILO CITY- Mas magahugot pa sa pagbantay ang Police Regional Office 6 sa ginalauman nga pagpalusot sang iligal nga druga sa Iloilo City sa tunga sang masako nga mga aktibidad kadungan sang Dinagyang Festival 2024.
Sa interview sang Bombo Radyo kay Police Brigadier General Sidney Villaflor, director sang Police Regional Office 6, iya ginpahayag nga ginaantisipar na nila ini nga posibilidad rason nga wala sila nagauntat sa ila intelligence gathering agud mapunggan ang mga durugista sa ila iligal nga buluhaton.
Suno kay Villaflor, nagapangabay man ini sa iban nga ahensya sang gobyerno kaangay sang Bureau of Customs nga mas mangin agresibo sa pagbantay batok sa mga kontrabando.
Matandaan nga sa sulod na sang pila ka semana nga minilyon ka pesos nga balor sang shabu ang nakumpiskar sang otoridad sa serye sang mga buy bust operations sa Iloilo City.
