ILOILO CITY – Nagahingyo ang kapulisan sa publiko nga likawan ang pag post sang impormasyon sa social media ilabi na kun indi ini verified.
Ini matapos nga gin pasakaan sang kaso ang isa ka persona sa banwa sang Pavia nga ginkilala si Adelbert Pedregosa bangud sa pagpalapta sang sala nga impormasyon.
Sa interview sang Bombo Radyo kay PMAJ Jojo Tabaloc, hepe sang Pavia MPS iya ginpahayag nga mahimo maka tuga sang panic ang pagpalapta sang sala nga impormasyon sa diin indi na maka desider sang maayo ang isa ka persona.
Suno kay Tabaloc, mangin leksyon na kuntani sa publiko ang nadangatan ni Pedregosa sa diin iya nga gin post sa iya social media account nga may yara sang 40 ka PUMS sa Pandac Pavia nga nagpamalibad nga mag paidalom sa quarantine.
Sa subong, naka gwa na si Pedregosa matapos nga naka piyansa.
Kaangot sini, may yara sang gin designar nga nagkalain-lain nga hotline ang Police Regional Office 6 agud nga magbaton sang mga compalaints may kaangtanan sa fake news.
Sa interview sang Bombo Radyo kay Pol Lt Col Joem Malong, tagapamaba sang Police Regional Office 6 iya ginpahayag nga, bukas 24 oras ang ila mga hotlines sa mga luyag magpalab-ot sang ila nga reklamo may kaangtanan sa fake news ukon sa luyag nga mag verify sang impormasyon lakip man ang mga concerns nila sa mga border checkpoints.
Suno kay Malong mahimo nga magamit nila ang mga masunod nga numero sang national headquarters agud mapalab-ot ang ila nga concern 0917 312 5626 kag 0998 894 0013.
Samtang yari naman ang numero sang PRO6, 0999 558 7914, 0999 995 5072, 0998 598 6101 kag 0998 996 7112.
Dugang sang natungdan, mahimo nga magapangatubang sang kaso nga administratibo ang sino man nga nagalapas sang Anti Cybercrime Law.
Magapatigayon naman sang cyber patrilling ang Regional Anti-Cybercrime Unit 6 sa diin ila nga tsekyaron ang mga nagapalapta sang sala nga impormasyon online lakip man ang mga nagaligya sang over priced nga medical supply.
Apang gin-ako sang natungdan nga mangin mabudlay ini para sa ila bangud ang iban sa mga suspek ang nagagamit sang pseudo accounts kag indi gilayon nga ma identify ang ila nga identity.
