Nagapangabay ang mga first town provincial jeepneys nga ipabilin nga sila ang pahanugutan nga magbyahe pasulod sa syudad sang Iloilo.
Ini kasunod sang pag-apruba sang Iloilo City Government sang Local Public Transport Route Plan (LPTRP) sang syudad nga amo ang nagresulta sa limitasyon sang byahe sang provincial jeepneys nga tubtob na lang sa perimeter boundaries ukon sa terminals.
Sa interview sang Bombo Radyo kay Pavia SB Member Pyt Trimañez, chairman sang committe on transportation sang amo nga banwa, iya ginpahayag nga sa lunes magapasar ini sang resolusyon nga naga apelar sa Department of Transporatation (DOTr) kag sa Iloilo City Government nga samtang ginakay-o pa ang ITGSI terminal, pahanugutan sa danay ang pagsulod sa syudad ang mga unit sang jeep nga may byahe Pavia Highway kag Pavia La Paz.
Suno kay Trimañes, 2018 sang ila gindihon ang LPTRP sang banwa sang Pavia kag wala man sang komentar ang Land Transportation Franchising and Regulatory Board (LTFRB) angut sa ila pagsulod sa syudad sang Iloilo.
Ila na lang ginkakibot nga may gin-utod sa Iloilo City LPTRP.
Gin-disapprove na lang suno sa iya sang LTFRB ang ila municipal LPTRP sang ginaprubahan ang LPTRP sang Iloilo City.
Sa interview naman sang Bombo Radyo kay Mr Jeck Conlu, pinuno sang Iloilo City Public Safety and Transportation Management Office (PSTMO), iya ginpahayag nga naghatag naman sila sang suhestyon sa probinsya angut sa ila ginadihon nga LPTRP agud nga gilayon ini nga maaprubahan kag ma-implementar.
Suno kay Conlu, pila ka mga opsyon ang ila ginakonsiderar apang ini ang nakadepende pa sa approval sang Department of Transportation (DOTr).
Ang implementasyon sang LPTRP sang syudad sunod kay Conlu ang indi gulpyada nga ipatuman agud nga mapreparahan man sang mga transport groups.
Dugang pa ni Conlu, ang mga provincial jeepneys nga may overlap route sa mga jeep sa syudad ang indi na gid pagpahanugutan nga magsulod sa Iloilo City bangud apektado man ang byahe sang mga PUVs sa syudad.
