ILOILO CITY – Ginapangitaan sang paagi sang Public Safety and Transportation Management Office nga mapahalin ang mga nagabaligya sa dalanon sa palibot sang Iloilo Terminal Market nga ginareklamo sang mga vendor nga yara sa sulod sang nasambit nga merkado.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga antes pa man siya nagpaidalom sa quarantine, iya na nga naistorya ang mga kaupod tuhoy sa nasambit nga problema.
Suno kay Conlu, ginahatagan man sang konsiderasyon ang mga ambulant vendor apang kinahanglan nga masulusyon ang nasambit nga problema agud nga mabuligan ang mga market vendors.
Ginpahayag ni Conlu nga iya hingyuon ang bulig sang mga barangay officials sang mga lugar nga yara sa palibot sang nasambit nga merkado.
Sang una suno sa natungdan, nasulusyunan na ang nasambit nga problema apang liwat naman nga nagbalik ang mga ambulant vendor matapos ginpauntat ang Oplan Hawan bangud sa ginapatuman nga community quarantine.
Ang baligyaanay sang mga ambulant vendor ang naga-umpisa 10:00 sa gab-i tubtub 7:00 sa aga.
