ILOILO CITY – Ginpasidunggan sang Police Regional Office (PRO) 6 ang pulis nga napilasan kadungan sang search warrant implementation sa Sitio Malbog, Brgy. Adcadarao, Ajuy, Iloilo.
Sa interview sang Bombo Radyo kay PRO-6 Director Police Brigadier General John Bulalacao, iya ginpahayag nga ang pasidungog nga ginhatag kay Patrolman Herbert Rezano Felera amo ang Medalya ng Sugatang Magiting kag financial assistance.
Ginpatigayon ang pagpasidungog sa isa ka pribado nga ospital sa syudad sang Iloilo kun sa diin na-admit si Felera.
Ang napilasan nga Patrolman suno kay Bulalacao ang katapo sang Special Operations Group sang Iloilo Police Provincial Office (IPPO).
Si Felera ang napilasan sa butkon kag tiyan matapos nga nagbato ang subject sang search warrant implementation si Ronald Margona Paja ukon kilala sa tawag nga Muros Paja kag Rodel Paja.
Si Paja ang makabig nga notoryos bangud sa paghupot sang indi lisensyado nga armas-luthang.
Matandaan nga sang ginpatigayon ang search warrant implementation sang Hunyo 15, nakapalagyo si Paja matapos nga nagbato sa mga otoridad sa diin natigayon naman nga makuha sa balay sang suspek ang 12 gauge shotgun kag Air gun rifle.
Matapos ang pila ka adlaw, nadakpan sang otoridad si Paja kag napasakaan na sang nagakaigo nga kaso.
